palkon pe yahi ḳhvab sajaya hai ki tum ho
ye samne mere koi tum sa hai ki tum ho
dastak si hui jab bhi to darvaze ko main ne
har baar yahi soch ke khola hai ki tum ho
raunaq men achanak jo izafa sa hua hai
angan men mire chand ka haala hai ki tum ho
hai talḳh haqiqat ki mujhe chhoḌ ga.e ho
ehsas magar ab bhi ye hota hai ki tum ho
bedar the jab tak to muḳhatib the tumhin se
jab aankh lagi ḳhvab men dekha hai ki tum ho
tum ruuh men utre ho pata ye nahin phir bhi
aamad ka har ik sher batata hai ki tum ho
Leave a Reply