Saifuddin Saif
teri ankhon men rang-e-masti hai
haan mujhe etibar-e-hasti hai
mera hona bhi koi hona hai
meri hasti bhi koi hasti hai
jaan ka rog hai ye girya-e-gham
umr bhar ye ghaTa barasti hai
jis tarah chandni mazaron par
dil pe yuun be-kasi barasti hai
dil-e-viran ko dekhte kya ho
ye vahi aarzu ki basti hai
‘saif’ is zindagi ko kya kahiye
ek mayyat-ba-dosh hasti hai
Leave a Reply