Poet
saari baten ḳhvab ki ta.abir se milti to hain
meri tahriren tiri tasvir se milti to hain
vo sahar ki dilkashi ho ya shafaq ki surḳhiyan
kuchh na kuchh ye aap ki tasvir se milti to hain
ahl-e-sarvat aaj bhi larzan hain jin ke naam se
mushkilen vo sab hamen taqdir se milti to hain
ye haqiqat hai ayaan tariḳh ke auraq se
zindagi ki rif.aten zanjir se milti to hain
sar-bulandi kamyabi rahaten azadiyan
aaj bhi ye jauhar-e-shamshir se milti to hain
tishna-lab rakkha tha jis ne asghar-e-ma.asum ko
ḳhuun ki bunden hamen us tiir se milti to hain
jin men ‘nusrat’ ek muddat ham bhaTakte hi rahe
zulmaten vo aaj ki tanvir se milti to hain
Leave a Reply