chehre pe mere rang pareshaniyon ka hai
dariya men saara zor hi tughyaniyon ka hai
ḳhud rahbaran-e-qaum hain ala.ishon men gum
ham se magar mutaliba qurbaniyon ka hai
ahbab mere is tarah mujh par hain ta.ana-zan
jaise ḳhulus naam hi nadaniyon ka hai
sahil jo kaT ke girte hain dariya ki god men
kya ye qusur bahte hue paniyon ka hai
insan nahin hai koi bhi saa.e zarur hain
manzar har ek shahr men viraniyon ka hai
kuchh ḳhauf-e-ehtisab na suud o ziyan ka Dar
ye fa.eda to be-sar-o-samaniyon ka hai
Leave a Reply