afzal-minhas

Jo Shakhs Bhi Mila Hai Wo Ek Zinda Lash Hai

jo shakhs bhi mila hai vo ik zinda laash hai

insan ki dastan badi dil-kharash hai

daman darida qalb-o-nazar zakhm zakhm hain

ab shahr-e-arzu men yahi bud-o-bash hai

bas ab to rah gai hai dikhave ki zindagi

sanson ke taar taar men ek irtiash hai

mitti ne pi liya hai hararat bhara lahu

josh-e-numu mila to badan qaash qaash hai

kanton ne bhi khizan ki ghulami qubul ki

dekho to aaj chehra-e-gul pur-kharash hai

vo daur ab kahan ki tumhari ho justuju

is daur men to ham ko khud apni talash hai

‘afzal’ vo ban sanvar ke to aa jaenge kabhi

aina-e-hayat magar paash paash hai

More Poems

Leave a Comment