Aftab Hussain
bas ek baat ki us ko khabar zaruri hai
ki vo hamare liye kis qadar zaruri hai
dilon men dard ki daulat bacha bacha ke rakho
ye vo mataa hai jo umr bhar zaruri hai
nahin zarur ki maqdur ho to saath rakhen
kabhi-kabhar magar nauhagar zaruri hai
kabhi to khel parinde bhi haar jaate hain
hava kahin ki bhi ho mustaqar zaruri hai
ye kya zarur ki mast apne aap hi men rahen
idhar udhar ki bhi kuchh kuchh khabar zaruri hai
mafar nahin gham-e-duniya se ‘aftab-husain’
bahut kathin hai ye manzil magar zaruri hai
Leave a Reply