Sabeensaif
baat kya hai ye bata.en to sahi
guftugu aage baḌha.en to sahi
jaan ja.enge khara khoTa hai kya
aap mujh ko azma.en to sahi
ungliyan uTThengi charon aap par
aap ik ungli uTha.en to sahi
banda-parvar na-umidi kufr hai
ik diya phir se jala.en to sahi
chand taare muntazir hain aap ke
asman tak aap jaa.en to sahi
vasl kar dega ḳhizan ko fasl-e-gul
phuul balon men laga.en to sahi
dekhiye suniye are jaane bhi den
aap mere saath aa.en to sahi
ḳhud ko rakh kar bhuul baiThi huun kahin
main kahan huun kuchh bata.en to sahi
aap to bas ghar bana kar rah ga.e
aap is ghar ko basa.en to sahi
chuTkiyon men bhuul ja.ungi unhen
ab mujhe vo yaad aa.en to sahi
niind ankhon se ḳhafa ho ja.egi
ḳhvab palkon par saja.en to sahi
jaan le lungi qasam allah ki
bhuul kar mujh ko bhula.en to sahi
azmane ke liye qismat ‘sabin’
dil ko daav par laga.en to sahi
Leave a Reply