Shaad Aarfi
chaman ko aag lagane ki baat karta huun
samajh sako to Thikane ki baat karta huun
sharab-e-talḳh pilane ki baat karta huun
ḳhud-agahi ko jagane ki baat karta huun
suḳhanvaron ko jalane ki baat karta huun
ki jagton ko jagane ki baat karta huun
uThi hui hai jo rangini-e-taghazzul par
vo har naqab girane ki baat karta huun
is anjuman se uThunga khari khari kah kar
phir anjuman men na aane ki baat karta huun
yahan charagh tale luuT hai andhera hai
kahan charagh jalane ki baat karta huun
vo baghban! jo phulon se bair rakhta hai
ye aap hi ke zamane ki baat karta huun
ravish ravish pe bichha do babul ke kanTe
chaman se lutf uThane ki baat karta huun
vahan sharab pilata huun ahl-e-binash ko
jahan bhi ḳhuun bahane ki baat karta huun
mizaj-e-husn kahin bad-maza na ho jaa.e
adal badal ke fasane ki baat karta huun
magar fareb-dahi men darkar hai achhuta-pan
tire fareb men aane ki baat karta huun
vahin se sher men barjastagi nahin rahti
jahan se haal chhupane ki baat karta huun
pila raha huun main kanTon ko ḳhun-e-dil ai ‘shad’
gulon ke rang uḌane ki baat karta huun
Leave a Reply