din le ke ja.un saath use shaam kar ke aa.uun
be-kar ke safar men koi kaam kar ke aa.uun
be-mol kar ga.iin mujhe ghar ki zaruraten
ab apne-ap ko kahan nilam kar ke aa.uun
main apne shor-o-shar se kisi roz bhaag kar
ik aur jism men kahin aram kar ke aa.uun
kuchh roz mere naam ka hissa raha hai vo
achchha nahin ki ab use bad-nam kar ke aa.uun
‘anjum’ main bad-dua bhi nahin de saka use
ji chahta to tha vahan kohram kar ke aa.uun
Leave a Reply