kabhi jo aankh pe gesu-e-yar hota hai
sharab-ḳhane pe abr-e-bahar hota hai
kisi ka gham ho mire dil pe baar hota hai
usi ka naam gham-e-rozgar hota hai
ilahi ḳhair ho un be-zaban asiron ki
qafas ke samne zikr-e-bahar hota hai
chaman men aise bhi do chaar hain chaman vaale
ki jin ko mausam-e-gul nagavar hota hai
saval-e-jam tire mai-kade men ai saaqi
javab-e-gardish-e-lail-o-nahar hota hai
hamen vafa pe vafa aaj tak na raas aa.i
unhen sitam pe sitam sazgar hota hai
labon pe aa gaya dam band ho chukin ankhen
chale bhi aao ki ḳhatm intizar hota hai
kahan vo vasl ki raten kahan ye hijr ke din
ḳhayal-e-gardish-e-lail-o-nahar hota hai
junun to ek baḌi chiiz hai mohabbat men
zara se ashk se raaz ashkar hota hai
mire janaze ko dekha to yaas se bole
yahan pe aadmi be-iḳhtiyar hota hai
ḳhuda rakhe tumhen kya koi jaur bhuul ga.e
jo ab talash hamara mazar hota hai
hamara zor hai kya baghban uTha lenge
ye ashiyan jo tujhe nagavar hota hai
ajiib kashmakash-e-bahr-e-gham men dil hai ‘qamar’
na Dubta hai ye beḌa na paar hota hai
Leave a Reply