sab ke chehron pe jab ḳhushi hogi
kya ‘dinesh’ aisi sub.h bhi hogi
log nikle hain jo ye sham.a liye
nirbhaya phir koi luTi hogi
sard mausam men be-gharon ki dasha
bebasi ḳhud bhi ro rahi hogi
kya kabhi inqalab aa.ega
in andheron men raushni hogi
sab ke honTon pe ye saval hai ab
kab siyasat ko hathkaḌi hogi
abr barsega TuuT kar jis din
duur dharti ki tishnagi hogi
uTh ke zalim ko de javab ‘dinesh’
zulm sahna to buzdili hogi
Leave a Reply