Mohammad Asadullah
chaTanon ki tarah hain ham magar TuuTe hue bhi hain
yahan har pal bikharne ka hamen andesha rahta hai
kabhi batil bhaga kar haq ko le jaata hai basti se
kabhi haq bhes men batil ke aa kar munh chiḌhata hai
kabhi andesha-e-batil hamen sone nahin deta
kabhi haq nim-shab darvaza aa kar khaTkhaTata hai
faza.en ek muddat se azanon ko tarasti hain
yahan har shaḳhs harf-e-haq faqat kanon men kahta hai
kahin ḳhud ko kisi shai ki tarah main bhuul aaya huun
yahan rahte hue mujh ko to kuchh aisa hi lagta hai
havaon ke alava kaun aa.ega hamare ghar
na jaane kis ki ḳhatir ye diya ab jhilmilata hai
Leave a Reply