Bina Dekhe Tujhe Apna Bana Kar Dekh Leta Hun

Poet

bina dekhe tujhe apna bana kar dekh leta huun

main tere astan par sar jhuka kar dekh leta huun

suna hai raaz chahat ka chhupana saḳht mushkil hai

tiri tasvir ankhon men chhupa kar dekh leta huun

andhere dil ki basti ke bhi shayad duur ho jaa.en

main tere naam ki mash.al jala kar dekh leta huun

shikayat doston ki hai mire ahbab ke lab par

chalo ab dushmanon ko aazma kar dekh leta huun

vo gul jan-e-bahar-e-arzu hai log kahte hain

use shaḳh-e-tamanna par saja kar dekh leta huun

mujh kuchh bhi nahin hasil hua unchi uḌanon se

qadam apni zamin par ab jama kar dekh leta huun

dua apne liye main ne kabhi mangi nahin koi

tiri ḳhatir main haath apne uTha kar dekh leta huun

paron men un ke kitni taqat-e-parvaz baaqi hai

parinde apni sochon ke uḌa kar dekh leta huun

kahan pahunchega mera karvan-e-shauq ai ‘shahid’

main apne aap ko rahbar bana kar dekh leta huun