ghair se un ki mulaqat kahan thi pahle
aaj jo baat hai vo baat kahan thi pahle
ab to be-bat hi rahte ho kashida-ḳhatir
be-ruḳhi mujh se ye be-bat kahan thi pahle
mere halat ne kuchh us ko tasalli di hai
mutma.in gardish-e-halat kahan thi pahle
ab to har baat pe ta.ana hi mujhe milta hai
aap ki bazm men ye baat kahan thi pahle
ho ke barbad main samjhi huun maqam-e-ulfat
varna mujh men ye karamat kahan thi pahle
aap hi meri tabahi ka banenge mujib
meri danist men ye baat kahan thi pahle
ghaur se dekhiye ye faiz-e-havas hai ‘raje’
is qadar amad-e-afat kahan thi pahle
Leave a Reply