poet

Nawak-Zani Nigah Ki Ai Jaan-E-Jaan Hai Hech

navak-zani nigah ki ai jan-e-jan hai hech

jab tiir hi na paar hua to kaman hai hech

dair-o-haram bhi hech hain aur hech bagh-o-ragh

koi jagah ho be tire ai la-makan hai hech

firdaus ham ko saya-e-daman-e-yar hai

duniya ki asl kuchh nahin bagh-e-jinan hai hech

kuchh maut ka na gham hai na kuchh rahat-e-hayat

kuche men us ke mujh ko bahar-o-khizan hai hech

charagari karega jo vo hai mizaj-dan

dard-e-darun ka ru-ba-ru us ke bayan hai hech

ho ja ke ku-e-yar men ai murgh-e-jan muqim

bagh-o-bahar hech hai aur ashiyan hai hech

qatil ke paas jaunga main khud hi sar-ba-kaf

maqtal men us ka aana pae imtihan hai hech

kya takiya us pe kijiye aalam hai be-sabat

hasti abas hayat abas jism-o-jan hai hech

tauhid-e-ishq men mujhe donon hain ek se

marg-o-hayat hech hai sud-o-ziyan hai hech

jo us ki khubiyon ka sana-khvan na ho kabhi

vo hech aur us ke dahan men zaban hai hech

huun mahv-e-did aankh uthaun main kis taraf

dekhun main kis ko juz tire husn-e-butan hai hech

juz zikr-e-yar aur kahani nahin pasand

sab qisse mujh ko hech hain aur qissa-khvan hai hech

nalan jo hain jahan men gham-e-ishq se tire

naqus un ko hech hai bang-e-azan hai hech

kya asl tegh ki tire abru ke samne

tir-e-mizha ke samne nok-e-sinan hai hech

hain band ankhen ‘barq’ ki dil men hai teri yaad

kya dekhe sar utha ke use sab jahan hai hech

More Poems

Leave a Comment