zaḳhm khane se ya koi dhoka khane se hua
baat kya thi main ḳhafa jis par zamane se hua
ek pal men ik jagah se itna raushan asman
koi taara bante bante TuuT jaane se hua
sochta rahta huun main aksar ki aghaz-e-jahan
din banane se ki pahle shab banane se hua
main ghalat ya tum ghalat the chhoḌo ab is baat ko
hona tha jo kuchh vo jaise ik bahane se hua
kuchh zamane ki ravish ne saḳht mujh ko kar diya
aur kuchh bedard main us ko bhulane se hua
baat saari asl men ye thi main us se bad-guman
ik ta.alluq men kahin pe shak ke aane se hua
bach hi nikla huun main jaaḌe ki baḌi yalghar se
garm ab ke ghar badan ka ḳhas jalane se hua
kya kahun meri giraftari ka koi ehtimam
kaise zer-e-dam rakkhe ek daane se hua
umr bhar ka ye jo hai ‘shahin’ ḳhasara ye mujhe
ek saude men koi neki kamane se hua
Leave a Reply