Poet
ai mauj-e-saba soz-e-mujassam use kahna
mumkin hai vo puchhe mira aalam use kahna
chaha mire halat ne paiham use kahna
lekin na hui pyaar ki lau kam use kahna
ik ham hi nahin shaki-e-alam use kahna
ab ahl-e-tarab ko bhi hai ye gham use kahna
shayad kabhi pad jaae kisi taur zarurat
milte hain sar-e-rahguzar ham use kahna
tu kis liye naraz hua ahl-e-vafa se
duniya to hamesha se hai barham use kahna
kahna to bahut kuchh hai magar maslahat-e-vaqt
be-ab se hain shoala-o-shabnam use kahna
maana ki mire dam se nahin bazm ki raunaq
phir bhi to ghanimat hai mira dam use kahna
Leave a Reply