Nabeel Ahmad Nabeel
sau uljhanon ke beach guzara gaya mujhe
jab bhi tiri talab men sanvara gaya mujhe
kam ho saka na phir bhi mira martaba agar
pasti men asman se utara gaya mujhe
suljhi na ek baar kahin zulf-e-zindagi
garche hazar baar sanvara gaya mujhe
apne mafad ke liye maidan-e-jang men
jiita gaya kabhi kabhi haara gaya mujhe
dhoya gaya badan mira ashkon ke aab se
mere lahu ke saath nikhara gaya mujhe
phir bhi ravan-davan huun main mauj-e-hayat men
sau baar garche dahr men maara gaya mujhe
rakh kar chalunga jaan hatheli pe main ‘nabil’
maqtal se jis ghaḌi bhi pukara gaya mujhe
Leave a Reply