Raheel Farooq
puḳhta hone na diya ḳhaam bhi rahne na diya
ishq ne ḳhaas to kya aam bhi rahne na diya
ha.e-re gardish-e-ayyam ki ab ke tu ne
shikva-e-gardish-e-ayyam bhi rahne na diya
aḳhir-kar pukara use zalim kah kar
dard ne dost ka ikram bhi rahne na diya
koi kyuun aa.ega dobara tiri jannat men
daana bhi chhin liya daam bhi rahne na diya
aish men pahle kahan apni basar hoti thi
yaad ne do ghaḌi aram bhi rahne na diya
dil ko avargiyan duur bahut chhoḌ aa.iin
zikr-e-ḳhair ek taraf naam bhi rahne na diya
vahi zanjir hai tere bhi gale men ‘rahil’
jis ne suraj ko lab-e-bam bhi rahne na diya
Leave a Reply