Siya Sachdev
arzuon ko ana-gir nahin kar sakte
ḳhvab ko paaon ki zanjir nahin kar sakte
kya sitam hai ki muqaddar men likha hai sab kuchh
phir bhi ham shikva-e-taqdir nahin kar sakte
jab bula.egi hamen maut chale ja.enge
hukm aisa hai ki taḳhir nahin kar sakte
ye safar vo hai ki jo chhuT gaya chhuT gaya
phir use paane ki tadbir nahin kar sakte
jang men kaise Tikenge vo bhala hasti ki
jo kisi shaḳh ko shamshir nahin kar sakte
aap to ḳhair baḌe aadmi kahlate hain
ham to chhoTon ki bhi tahqir nahin kar sakte
sab pe pabandi usulon ki ‘siya’ lazim hai
suḳhan-o-sher ko jagir nahin kar sakte
Leave a Reply