bujhne lage nazar to phir us paar dekhna
dariya chaḌhe to naav ki raftar dekhna
is agahi ke a.ina-e-ḳhud-misal men
ḳhud apni zaat ko sar-e-paikar dekhna
a.ankhon se rat-jagon ki hararat nahin ga.i
ai yad-e-yar tishna-e-azar dekhna
honTon pe aa ke jam si ga.i ḳhvahish-e-visal
is an-kahi pe lazzat-e-inkar dekhna
ham vo vafa-parast tujhe dekhne ke ba.ad
apni taraf bhi surat-e-divar dekhna
shaḳh o samar to munsif o qatil ke ho ga.e
ab kis ke sar pe girti hai talvar dekhna
yuun hai ki jab bichhaḌne lagen dil se dhaḌkanen
tab us gali men sub.h ke asar dekhna
ab ye dil o nigah ke bas men nahin raha
har a.ine men aks-e-ruḳh-e-yar dekhna
sahil ko mauj le ga.i aur us ko badban
ḳhavar ab is ke ba.ad na us paar dekhna
Leave a Reply