Amir Hamza Saqib
tire ḳhayal ke jab shamiyane lagte hain
suḳhan ke paanv mire laḌkhaḌane lagte hain
jo ek dast-e-burida savad-e-shauq men hai
alam uTha.e hue us ke shane lagte hain
main dasht-e-hu ki taraf jab uḌaan bharta huun
tiri sada ke shajar phir bulane lagte hain
ḳhabar bhi hai tujhe is daftar-e-mohabbat ko
jalane jalne men kya kya zamane lagte hain
ye gard hai miri ankhon men kin zamanon ki
na.e libas bhi ab to purane lagte hain
tumhare meva-e-lab ko nigah se chhute hi
ajiib lazzat-e-nayab paane lagte hain
jo sansanata hai kuufa o nainva ka ḳhayal
gulu-e-jan ki taraf tiir aane lagte hain
Leave a Reply