Isma Hadia
kisi bachpan men bana.i hui kashti jaisa
saath tera tha magar dhuup ki narmi jaisa
main musafir thi ki manzil hi nahin thi jis ki
tu mire saath kisi rail ki paTri jaisa
phuul shaḳhon pe koi khil hi nahin paaya tha
mausam-e-vasl kisi hijr ki saḳhti jaisa
saḳhtiyan bolti rahti thiin tire lahje men
aur mira dil ye kisi kanch ki chuḌi jaisa
ham tire va.ade ki zanjir liye baiThe rahe
jagti aankh men ik ḳhvab tha lori jaisa
dard in ankhon se dariya ki tarah nikla hai
‘hadia’ ham to samajhte the sarabi jaisa
Leave a Reply