laboñ par un ke hayāt-āfrīñ hañsī na rahī
guloñ meñ ruuh sitāroñ meñ raushnī na rahī
ḳhudā shanāsoñ kī pahchān hī koī na rahī
ki sar-kashī bhī ba-andāz-e-sar-kashī na rahī
fasāna gardish-e-daurāñ kā nazm kar lete
magar nigāh meñ un kī vo barhamī na rahī
vaqār-e-zauq-e-tajassus pe harf aa.egā
agar sharīk-e-safar apne gumrahī na rahī
hai apnā soz-e-tabassum sharīk-e-sāz-e-chaman
asīr-e-girya-e-shabnam koī kalī na rahī
rahe nigāh meñ ādāb-e-laġhzish-e-ulfat
ḳhudī se dab ke kabhī apnī be-ḳhudī na rahī
milā thā mauqa-e-takmīl-e-dāstān-e-hayāt
jabīn-e-gul pe shikan aur kheltī na rahī
shab-e-firāq kuchh aise bhī hādse guzre
charāġh jalte rahe aur raushnī na rahī
banā.e ham ne ‘shifā’ dostī ke vo sāñche
ki dushmanoñ ko tamannā-e-dushmanī na rahī