Usi Ke Dam Pe to Ye Dosti Bachi Hui Thi

Liaqat Jafri

usi ke dam pe to ye dosti bachi hui thi

hamare biich men jo ham-sari bachi hui thi

hamare biich men ik puḳhtagi bachi hui thi

bachi hui thi magar aarzi bachi hui thi

usi ke nuur se ye raushni bachi hui thi

mire nasib men jo tirgi bachi hui thi

usi ke dam pe manaya tha us ne jashn mira

ki dushmani men bhi jo dosti bachi hui thi

kamal ye tha ki ham bahs haar baiThe the

hamare lahje ki sha.istagi bachi hui thi

agarche ḳhatm the rishte paḌosiyon vaale

hamare biich men hamsa.egi bachi hi thi

badal chuka tha vo apna mizaj mere liye

magar dikhave ko ik be-ruḳhi bachi hui thi

usi ke nuur se pur-nur tha ye saara jahan

hamari aankh men jo raushni bachi hui thi

ab is maqam pe pahuncha diya tha ham ne ishq

junun ḳhatm tha divangi bachi hui thi

usi ne joḌ ke rakkha hua tha rishte ko

hamare biich men jo barhami bachi hui thi

is ek baat ki sharmindagi ne maar diya

mire vajud tiri tishnagi bachi hui thi

ubuur kar liya sahra to phir se lauT aa.e

junun baaqi tha ashuftagi bachi hui thi

main gahe-gahe use yaad kar hi leta tha

isi bahane miri zindagi bachi hui thi

usi ke dam pe paḌhe bhi ga.e sune bhi ga.e

hamare lahje men jo chashni bachi hui thi

zamane teri hunar-kosh razm ke hathon

main luT chuka tha magar sha.eri bachi hui thi

vo kaun raaz tha jis ko bayan kar na sake

vo kaun baat thi jo ‘ja.afari’ bachi hui thi