nikle vo phuul ban ke tire gulsitan se ham
mahka diya fazaon ko guzre jahan se ham
ab to yahi harim-e-mohabbat hai ai sanam
jaa.en kahan ab uTh ke tire astan se ham
duniya men ab kahin bhi Thaharti nahin nazar
tujh sa hasin laa.en to laa.en kahan se ham
dil le ke jis ne dard-e-mohabbat ata kiya
mangenge ab dava bhi usi mehrban se ham
daman men kuchh to Daal de apne karam ki bhiik
daman tahi na ja.enge us astan se ham
tera karam raha jo rah-e-ishq men sanam
ik roz aa milenge tire karvan se ham
likkhi hui thi qaid-e-anasir nasib men
le kar chale hain apna qafas ashiyan se ham
rah-e-junun men khilne lage ashiqi ki phuul
un ke karam ke saa.e men guzre jahan se ham
Thukra.en ya navaz len vo ham ko ai ‘fana’
shikva kabhi karenge na apni zaban se ham
Leave a Reply