TuT Kar Ahd-E-Tamanna Ki Tarah

TuuT kar ahd-e-tamannā kī tarah

mo’tabar ham rahe fardā kī tarah

shauq-e-manzil to bahut hai lekin

chalte haiñ naqsh-e-kaf-e-pā kī tarah

jā mileñge kabhī gulzāroñ se

phailte jā.eñge sahrā kī tarah

dekh kar hāl-e-pareshāñ apnā

ham bhī hañs lete haiñ duniyā kī tarah

kabhī pāyāb kabhī tūfānī

ham bhī haiñ dasht ke dariyā kī tarah

mahfil-e-nāz meñ rahiye lekin

dekhiye chashm-e-tamāshā kī tarah

apne dushman se huuñ vāqif ‘tābish’

kisī derīna shanāsā kī tarah

Leave a Comment