Jameel Malik
DhunDte phirte hain zaḳhmon ka mudava nikle
is bhare shahr men koi to masiha nikle
uf ye amboh-e-ravan haa.e miri tanha.i
kahin rasta nazar aa.e koi tum sa nikle
chand se chehron pe pathra.i hui zard ankhen
koi batlao ye kis shahr men ham aa nikle
pas-e-divar khaḌa hai koi tanha kab se
tu na nikle tire ghar se tira saaya nikle
jin pe sau naaz kare anjuman-ara.i bhi
ghaur se dekha to vo log bhi tanha nikle
ye sitaron ke taḌapte hue simin paikar
jaane kab raat Dhale nuur ka dariya nikle
chand suraj se bhi tariki-e-dauran na ga.i
dekhiye parda-e-aḳhliq se ab kya nikle
Leave a Reply