dhaḌkan men nihan ishq ke azar se pahle
ik aur hasin gham hai gham-e-yar se pahle
fitrat ki tamanna ka jo darpan hain vo naghme
gaati hain hava.en dil-e-fankar se pahle
mausam ne to badal ke abhi bandhe hain ghunghru
dil jhuum uTha hai mira jhankar se pahle
ham apne ḳhayalon men the kuchh bhi nahin samjhe
maujon men to halchal si thi manjdhar se pahle
socha hi tha sajde men jhuken ḳhud miri ankhen
irfan-e-ḳhuda ho gaya didar se pahle
gar aap ko tariḳh samajhni hai hamari
shaḳh-e-gul-e-tar dekhiye talvar se pahle
badal bhi banane ka hunar siikh lo ‘asrar’
sahra bhi milega rah-e-dil-dar se pahle
Leave a Reply