chand lamhon men mo.amma ziist ka hal kar gaya
ek divana ḳhirad-mandon ko pagal kar gaya
dhuup tapti ret par dariya pe badal kar gaya
us ka har kirdar mere zehn ko shal kar gaya
be-asar be-rabt lahja be-tavazun guftugu
vo mila bhi to tabi.at aur bojhal kar gaya
maslahat-amez baten abr ban kar chha ga.iin
dil ka savan is tarah barsa ki jal-thal kar gaya
meri aahaT pa ke jis ke chaunk uThte the kivaḌ
koi aaj is ghar ka darvaza muqaffal kar gaya
har taraf ye aam shohrat hai ki koi shah-savar
aaj saare shahar ke logon ko paidal kar gaya
sard lahje men vo mujh se guftugu karne ke ba.ad
jab uTha to rabt-e-zehn-o-dil mo.attal kar gaya
mauj us chehre pe likha ek lafz-e-intishar
ḳhud-farebi ke sabhi qisse mukammal kar gaya
Leave a Reply