ik ḳhvab-e-atishin ka vo mahram sa rah gaya
divar-o-dar men sho.ala-e-barham sa rah gaya
sher-e-vatan ke pyale pe thiin kal ziyafaten
aaya jo ta-ba-lab to faqat sam sa rah gaya
maana vafa bara.e-vafa ittifaq thi
tum sa raha koi na koi ham sa rah gaya
ik la-ta.alluqi ki faza darmiyan rahi
jab do dilon men farq bahut kam sa rah gaya
us sarv-qad ki tab-o-mula.em-ruḳhi ka raaz
isyan ki shab men dida-e-pur-nam sa rah gaya
aḳhir hui bahar magar rang-e-gul ka ḳhvab
dil men dua nigah men shabnam sa rah gaya
ik us ke rang-e-ruḳh ki junun-saz chhuT se
is zindagi men ḳhvab ka aalam sa rah gaya
Leave a Reply