kahne ko to har baat kahi tere muqabil
lekin vo fasana jo mire dil pe raqam hai
mahrumi ka ehsas mujhe kis liye hota
hasil hai jo mujh ko kahan duniya ko baham hai
ya tujh se bichhadne ka nahin hausla mujh men
ya tere taghaful men bhi andaz-e-karam hai
thodi si jagah mujh ko bhi mil jaae kahin par
vahshat tire kuche men mire shahar se kam hai
ai ham-safaro tuute na sanson ka tasalsul
ye qafila-e-shauq bahut tez-qadam hai
Leave a Reply