Manzar Bhopali
sitamgaron ke sitam ki uḌaan kuchh kam hai
abhi zamin ke liye asman kuchh kam hai
jo is ḳhayal ko bhule to maare jaoge
ki apni samt qayamat ka dhyan kuchh kam hai
hamare shahr men sab ḳhair-o-afiyat hai magar
yahi kami hai ki amn-o-aman kuchh kam hai
bana raha hai falak bhi azaab mere liye
teri zamin pe kya imtihan kuchh kam hai
abhi shumar ke qabil hain zaḳhm-e-dil mere
abhi vo dushman-e-jan mehrban kuchh kam hai
idhar to dard ka pyala chhalakne vaala hai
magar vo kahte hain ye dastan kuchh kam hai
hava-e-vaqt zara pairahan ki ḳhair mana
ye mat samajh ki parindon men jaan kuchh kam hai
Leave a Reply