Charagh Le Ke Hatheli Pe Chal Sakoge Kya

charāġh le ke hathelī pe chal sakoge kyā

ghanā añdherā hai bāhar nikal sakoge kyā

nizām bikhrā huā hai avaam be kal hai

banī huī hai jo sūrat badal sakoge kyā

tumhāre apne lage haiñ tumheñ girāne meñ

zamīñ pe tel lagā hai sañbhal sakoge kyā

jhuke saroñ se ye lagtā hai bebasī hai koī

tum aisī haañ ko nahīñ meñ badal sakoge kyā

tumheñ ye naaz hai ‘ulfat’ tum achchhe insāñ ho

magar ye aag parā.ī hai jal sakoge kyā

Leave a Comment