Prem Warbartani
aaj kya dekha ḳhalaon ke sunahre ḳhvab men
regzaron ke siva kuchh bhi nahin mahtab men
jab se pahna hai na.e mausam ne zaḳhmon ka libas
phuul se khilne lage hain dida-e-ḳhun-nab men
nisf shab ko niind men chalta hua paikar koi
naqsh-e-pa kyuun chhoḌ jaata hai dayar-e-ḳhvab men
vo to ḳhud apne tajassus men bhaTak kar rah ga.e
tazkira tha jin ki azmat ka bahut ahbab men
chheḌta hai saz-e-shab ko yuun samundar ka sukut
Duub jaati hai faza sangit ke sailab men
Leave a Reply