ye sahra-e-talab ya besha-e-ashufta-hali hai
koi daryuza-gar apna koi tera savali hai
havadis se nabard-ara.iyon ka kis ko yaara tha
junun apna salamat jis ne har uftad Taali hai
tire aghmaz ki ḳhu siikh li ahl-e-muravvat ne
ki mahfil dard ki ab sahab-e-mahfil se ḳhali hai
huzuri ho ki mahjuri mohabbat kam nahin us se
tab apna baḳht-e-ali tha ab apna zarf-e-ali hai
numu ka josh kuchh nazzara-farma ho to ho varna
bahar ab ke baras ḳhud pa.imal-e-ḳhushk-sali hai
kisi ke lutf-e-kam ko der lagti hai siva hote
chaTakne tak to har gul ki jibillat infi.ali hai
sharaf itna ki ‘ghalib’ ki zamin men hai ghazal ‘gauhar’
vo mazmun-afrini hai na vo nazuk-ḳhayali hai
Leave a Reply