Aaina Sina-E-Sahab-Nazaran Hai Ki Jo Tha

Haidar Ali Aatish

aaina sina-e-sahab-nazaran hai ki jo tha

chehra-e-shahid-e-maqsud ayaan hai ki jo tha

ishq-e-gul men vahi bulbul ka fughan hai ki jo tha

partav-e-mah se vahi hal-e-katan hai ki jo tha

alam-e-husn khuda-dad-e-butan hai ki jo tha

naz-o-andaz bala-e-dil-o-jan hai ki jo tha

raah men teri shab-o-roz basar karta huun

vahi miil aur vahi sang-e-nishan hai ki jo tha

roz karte hain shab-e-hijr ko bedari men

apni ankhon men subuk khvab-e-giran hai ki jo tha

ek aalam men ho har-chand masiha mashhur

nam-e-bimar se tum ko khafaqan hai ki jo tha

daulat-e-ishq ka ganjina vahi siina hai

dagh-e-dil zakhm-e-jigar mohr-o-nishan hai ki jo tha

naz-o-andaz-o-ada se tumhen sharm aane lagi

aarzi husn ka aalam vo kahan hai ki jo tha

jaan ki taskin ke liye halat-e-dil kahte hain

be yaqini ka tiri ham ko guman hai ki jo tha

asar-e-manzil-e-maqsud nahin duniya men

raah men qafila-e-reg-e-ravan hai ki jo tha

dahan us ru-e-kitabi men hai par na-paida

ism-e-azam vahi quran men nihan hai ki jo tha

kaaba-e-madd-e-nazar qibla-numa hai ta-hal

ku-e-janan ki taraf dil nigaran hai ki jo tha

koh-o-sahra-o-gulistan men phira karta hai

mutalashi vo tira ab-e-ravan hai ki jo tha

sozish-e-dil se tasalsul hai vahi aahon ka

uud ke jalne se mujmir men dhuan hai ki jo tha

raat kat jaati hai baten vahi sunte sunte

sham-e-mahfil sanam-e-charb-zaban hai ki jo tha

pa-e-kham maston ke hu-haq ka jo aalam hai so hai

sar-e-mimbar vahi vaaiz ka bayan hai ki jo tha

kaun se din nai qabren nahin is men bantin

ye kharaba vahi ibrat ka makan hai ki jo tha

be-khabar shauq se mere nahin vo nur-e-nigah

qasid-e-ashk shab-o-roz vahan hai ki jo tha

lailatul-qadr kinaya na shab-e-vasl se ho

us ka afsana miyan-e-ramazan hai ki jo tha

din-o-duniya ka talabgar hanuz ‘atish’ hai

ye gada sail-e-nadq-e-do-jahan hai ki jo tha