sambhalne se tabi.at kahan sambhalti hai
vo be-kasi hai ki duniya ragon men chalti hai
ye sard-mehr ujala ye jiti-jagti raat
tire ḳhayal se tasvir-e-mah jalti hai
vo chaal ho ki badan ho kaman jaisi kashish
qadam se ghaat ada se ada nikalti hai
tumhen ḳhayal nahin kis tarah bata.en tumhen
ki saans chalti hai lekin udaas chalti hai
tumhare shahr ka insaf hai ajab insaf
idhar nigah udhar zindagi badalti hai
bikhar ga.e mujhe sanche men Dhalne vaale
yahan to zaat bhi sanche samet Dhalti hai
ḳhizan hai hasil-e-hangama-e-bahar ‘ḳhizan’
bahar phulti hai ka.enat phalti hai
Leave a Reply