aaKHir-E-Shab Bhi Kisi KHwab Ki Ummid Mein Hun

Ishaq Athar Siddiqui

aḳhir-e-shab bhi kisi ḳhvab ki ummid men huun

ik na.i sub.h na.e din na.e ḳhurshid men huun

mujh se vo kaise kare harf-o-hikayat aghaz

main abhi silsila-e-harf ki tamhid men huun

mujh men bhi faqr ki halki si jhalak milti hai

hai mujhe faḳhr ki ik surat-e-taqlid men huun

main ne dekha hai use ya nahin dekha us ko

main abhi tak to usi kashmakash-e-did men huun

meri har saans hai isbat-o-nafi ki takrar

mujh ko kya ilm ki kab halat-e-tardid men huun

sar-kashida huun to kya madd-e-muqabil huun to kya

mere qatil main tiri tegh ki ta.id men huun

ḳhushk shaḳhon men abhi zauq-e-numu baaqi hai

main na.i rut se phir ik ahd ki tajdid men huun