chala aa raha huun samundaron ke visal se
kai lazzaton ka sitam liye
jo samundaron ke fusun men hain
mira zehn hai vo sanam liye
vahi reg-zar hai samne
vahi reg-zar ki jis men ishq ke aaine
kisi dast-e-ghaib se tuut kar
rah-e-tar-e-jan men bikhar gae!
abhi aa raha huun samundaron ki mahak liye
vo thapak liye jo samundaron ki nasim men
hai hazar rang se khvab-ha-e-khunuk liye
chala aa raha huun samundaron ka namak liye
ye barahnagi-e-azim teri dikhaun main
(jo gada-gadi ka bahana hai)
koi rah-rau ho to us se raah ki dastan
main sunun fasana samundaron ka sunaun main
(ki samundaron ka fasana ishq ki gastarash ka fasana hai)
ye barahnagi jise dekh kar badhen dast o pa na khule zaban
na khayal hi men rahe tavan
to vo reg-zar ki jaise rah-zan-e-pir ho
jise tab-e-rah-zani na ho
ki misal-e-taer-e-nim-jan
jise yad-e-bal-o-pari na ho
kisi rah-rau se umid-e-rahm-o-karam liye
main bhara hua huun samundaron ke jalal se
chala aa raha huun main sahilon ka hasham liye
hai abhi inhi ki taraf mira dar-e-dil khula
ki nasim-e-khanda ko rah mile
miri tirgi ko nigah mile
vo surur-o-soz-e-sadaf abhi mujhe yaad hai
abhi chatti hai samundaron ki zaban mujhe
mire paanv chhu ke nikal gai koi mauj-e-saz ba-kaf abhi
vo halavaten mire hast o buud men bhar gaiin
vo jazire jin ke ufuq hujum-e-sahar se did-bahar the
vo parinde apni talab men jo sar-e-kar the
vo parinde jin ki safir men thiin risalaten
abhi us safir ki jalvaten mire khuun men hain
abhi zehn hai vo sanam liye
jo samundaron ke fusun men hain
chala aa raha huun samundaron ke jamal se
sadaf o kanar ka gham liye
Leave a Reply