ghalat-bayani pe us ki yaqin dikhati rahi
main sab samajhti rahi aur muskurati rahi
ye soch kar ki taghaful to us ki fitrat hai
main apne dil ko baḌi der tak manati rahi
use to lauT ke aana hi tha vo lauT aaya
magar vo aaya to hathon se umr jaati rahi
ajab rivayati aurat hai zindagi meri
hamesha hasb-e-zarurat hi chahi jaati rahi
use chaman ki bahar-o-ḳhizan se kya matlab
vo ek bholi si chiḌiya thi chahchahati rahi
vo din ki bojh kaḌi dhuup men uThata raha
main ratjagon ki thakan oḌhti bichhati rahi
nazar men rahna tha ‘nusrat’ to us ki palkon se
tamam umr main gard-e-safar haTati rahi
Leave a Reply