Mohammad Khalid
DhunD leti hain koi mahtab sa manzar kahin
jagti rahti hain ankhen ḳhvab ke andar kahin
Daal lete hain bhala zanjir-e-ishrat paanv men
taan kar chalte hain sar par dard ki chadar kahin
is ḳhayal-e-naz men hota hai shab bhar jagna
ek kaif-e-hijr men hoga mira bistar kahin
dil ke andar chupke chupke jagti hai be-kali
shor karti hain hava.en jism ke bahar kahin
aankh men bedariyon ki dhuul girti ja.egi
asman sar par uTha.enge mah-o-aḳhtar kahin
har sada-e-naghma hai avaza-e-mahshar mujhe
dil larazta hai badal jaa.e na ye manzar kahin
Leave a Reply