Jazba-E-Be-Karana

Zahida Zaidi

luta do luta do

ye afkar-o-anvar ka

nim-khufta khazana

umadte simatte

talatum se dhalo

koi dard-agin fasana

makan la-makan hai

zaman be-karan hai

nihan hai

isi mehvar-e-arzu men

tumhare khad-o-khal ka

aks-e-mauhum

parvaz ka jazba-e-be-karana

ghani aur be-nur rahon men

banaogi kya ashiyana

luta do lundha do

bachi hai jo ab jaam men

ye sharab-e-shabana

ki anjam-e-hasti

fana ke samundar men hai

duub jaana