baagh men jugnu chamakte hain jo pyare raat ko
yaad aate hain un ankhon ke ishare raat ko
shub.h hai tum ko kahan TuuTe hain taare raat ko
dam-ba-dam aansu Tapakte the hamare raat ko
TuuTe taare saikḌon yuun qudsiyon ke dil hile
dard se jis vaqt ham tum ko pukare raat ko
puuri gardish asman ne shaam se ki ta-sahar
aaj main ne gin liye saare sitare raat ko
dhuup nikli din ko chehre se haTa li jab naqab
chandni phaili jahan kapḌe utare raat ko
saaf karvaT lene ki avaz aa.i kaan men
su-e-dil jab jhuk ke ham tum ko pukare raat ko
zarron ko shabash din ko hain huzur-e-mahr-e-ruḳh
dekhiye chhup ke nikalte hain sitare raat ko
hijr ki muddat na hogi ḳhatm sabit ho chuka
din ko zarre gin chuka main aur taare raat ko
ulfat-e-ruḳh men hai vahshat yad-e-gesu men buka
din ko sahra men hain dariya ke kinare raat ko
aa ga.i sub.h-e-qayamat aur main soya nahin
phir na aa.i niind tum jab se sidhare raat ko
dil jigar lene phir aa.e sub.h ko kahte hue
rah ga.e bistar pe do moti hamare raat ko
munh pe zulf-e-zar-fishan hai mujh se hai rone ka hukm
chandni dekhi hai dariya ke kinare raat ko
aap ara.ish bhi karte hain muafiq vaqt ke
din ko munh dhoya gaya gesu sanvare raat ko
DhunDhte phirte hain dil ko sub.h se har-su ‘rashid’
dil-ruba tha ek pahlu men hamare raat ko
Leave a Reply