Maher Chand Kausar
dekhta bhi hai dekhta bhi nahin
jaise vo mujh ko janta bhi nahin
kis tarah aaj ḳhud ko pahchanun
mere ghar men to aa.ina bhi nahin
dhaak thi saare shahr men jis ki
ab use koi puchhta bhi nahin
pichhe muḌne men ḳhauf-e-rusva.i
aage jaane ka rasta bhi nahin
roz ḳhabron men naam aata hai
shahr men koi janta bhi nahin
ghair se puchhta hai haal mira
main bula.un to bolta bhi nahin
us ko nikla huun DhunDne ‘kausar’
jis ka koi ata-pata bhi nahin
Leave a Reply