mizha pe ashk-e-alam jhilmila.e aḳhir-e-shab
bichhaḌne vaale bahut yaad aa.e aḳhir-e-shab
vo jin ke qurb se Dharas thi mere dil ko bahut
koi kahin se unhen DhunD laa.e aḳhir-e-shab
ye shor-e-bad-e-zamistan ye rasta sunsan
Dara rahe hai daraḳhton ke saa.e aḳhir-e-shab
hava men dard ki shiddat se zamzama-paira
sunega kaun ye meri sada-e-aḳhir-e-shab
ravana hone ko hai karvan sitaron ka
phir us ke ba.ad kahan naqsh-e-pa-e-aḳhir-e-shab
kidhar chali hai nigar-e-falak kise ma.alum
ye tasht-e-mah-o-sitara uTha.e aḳhir-e-shab
vo teri yaad ke mehman ho ga.e ruḳhsat
ujaḌ ga.i mire dil ki sara.e aḳhir-e-shab
phir us ke ba.ad vahi dhuup hai mashaqqat ki
zara si der ko hai ḳhvabna.e aḳhir-e-shab
nasib ho saf-e-a.indagan ko taaza sahar
mire labon pe yahi hai dua-e-aḳhir-e-shab
vo so ga.e hain jinhen jagne ki aadat thi
kise pukar rahi hai hava-e-aḳhir-e-shab
‘farasat’ ab hui mahfil tamam ghar ko chalo
sarak rahi hai falak par rida-e-aḳhir-e-shab
Leave a Reply