Poet
sune-sune dar-o-rasan batlate hain
sach kahne se log bahut katrate hain
aansu ban jaate hain gham kahlate hain
vo jazbe jo dil hi men mar jaate hain
ye hai baat juda vo ham se kah na sake
varna ḳhvab to gunge ko bhi aate hain
jis ki janib aankh uThana mushkil ho
ham us sachcha.i par qalam uThate hain
har farma.ish a.inda par Talta huun
bachche mujh se jhuuT bahut bulvate hain
dil teri qurbat men bhi afsurda hai
kya shaḳhon par bhi ghunche kumhlate hain
dida-o-dil donon kyon ik saath bujhe
mehr-o-mah ikaTThe kab gahnate hain
saa.e phal aur phulon ke badle ‘nusrat’
sochiye ham ashjar ko kya lauTate hain
Leave a Reply