Sheen Kaaf Nizam
mauj-e-hava se phulon ke chehre utar ga.e
gil ho ga.e charagh gharaunde bikhar ga.e
peḌon ko chhoḌ kar jo uḌe un ka zikr kya
paale hue bhi ghair ki chhat par utar ga.e
yadon ki rut ke aate hi sab ho ga.e hare
ham to samajh rahe the sabhi zaḳhm bhar ga.e
ham ja rahe hain TuTte rishton ko joḌne
divar-o-dar ki fikr men kuchh log ghir ga.e
chalte huon ko raah men kya yaad aa gaya
kis ki talab men qafile vaale Thahar ga.e
jo ho sake to ab ke bhi sagar ko lauT aa
sahil ke siip svاati ki bundon se bhar ga.e
ik ek se ye puchhte phirte hain ab ‘nizam’
vo ḳhvab kya hue vo manazir kidhar ga.e
Leave a Reply