Habeeb Kaifi
jab bhi us ki ḳhvahish rakhna
achchha hai kuchh danish rakhna
laakh man.a kar dene par bhi
jaari apni koshish rakhna
main ne mohabbat sikhla.i thi
sikha kis ne ranjish rakhna
dil mandir masjid jaisa hai
dil men na koi sazish rakhna
ḳhvahish men sar bhi jaate hain
soch samajh kar ḳhvahish rakhna
chahat ka matlab hota hai
dil men zinda atish rakhna
hans dene par us ke aage
koi mat farma.ish rakhna
Leave a Reply