phir aap ne dekha hai mohabbat ki nazar se
guzre na kahin gardish-e-dauran bhi idhar se
puchhen to zara pech-o-ḳham-e-rah ki baten
kuchh log abhi lauT ke aa.e hain safar se
shayad kahin suraj ki kiran shaam ko phuTe
ham sham.a jala.e hue baiThe hain sahar se
logo miri ashufta-sari par na karo tanz
ilzam utaro koi us zulf ke sar se
dekha na unhen dida-e-hairat ne dobara
jalvon ko shikayat hai miri tab-e-nazar se
ḳhushbu-e-gul-o-lala chhupa lete hain patte
ab qadr-e-hunar hai to faqat arz-e-hunar se
taare to chamak apni dikhate hain sahar tak
dil Dubne lagta hai magar pichhle pahar se
ghairon ki nigahen tire jalvon se hain sairab
ai kaash ye badal miri ankhon pe bhi barse
zulmat hi ke saa.e men sukun DhunDiye ‘maz.har’
ḳhairat bahut maang chuke nur-e-sahar se
Leave a Reply